Labada

(tula para sa isang kaibigan)

Kahapon
Ibinabad ko sa sabon
Ang t-shirt na bigay mo.
Umaasang maalis nito
Ang mga mantsang nanikit
Dahil sa ilang taong pasakit

Kagabi
Kinusot ko ito nang ilang beses
Hanggang maramdaman ko
Ang hapdi sa aking mga palad
Hindi ko ininda ang sakit
Kahit may mga dugo na
Ang mga sugat ko
Dahil umaasang maililigtas ko pa
Ang ating pagmamahalan

Kanina
Ikinula ko sa init ng araw
Umaasang muli kong mararamdaman
Ang init ng iyong pagmamahal
Kapag isinuot ko ulit
Ang bigay mong t-shirt

Ngayon
Nasa SM ako
Isinusukat ko ang matingkad na blusa
Ngayon ko lamang ulit napansin
Pagkaraan ng maraming taong kita’y kasama
Na bagay pala sa akin
Ang matingkad na blusa

Mamaya
Itatapon ko na ang t-shirt na bigay mo

Paalam, irog ko.

Kaulayaw sa Karton at Kariton

Umaalingasaw
Ang masangsang na amoy
Ng natuyong ihi sa gilid ng kariton

Humihiyaw
Ang karton
Na piping saksi sa nangyayari sa loob

Lumalangitngit
Ang mga pinagtagni-tagning tabla ng kariton
Na animo'y sumasabay sa sayaw
Sa bawat indak ng magsing-irog

Bumubulwak
Ang pinaghalong pawis at katas
Ng pinag-isang katawan
Sa ibabaw ng karton
Sa loob ng kariton

Ngunit ang masangsang na amoy,
Ang lumang karton,
Ang maingay na kahoy,
Ay hindi alintana

Ang mahalaga
Ang dalawang pusong pinag-isa
Sa ibabaw ng karton
Sa loob ng kariton

Eh Ano Ngayon?

Sabi mo ayaw mo na sa akin.

Kasi mataba na ako.

Eh, ano ngayon?

Na-enjoy ko naman ang Hershey’s at Wall’s.

Sabi mo ayaw mo na sa akin.

Kasi hindi mo na ako masakyan.

Eh, ano ngayon?

Kaya ko namang magbiyaheng mag-isa.

Sabi mo ayaw mo na sa akin.

Kasi luma na ang estilo ko sa pagsulat ng tula.

Hindi na uso ang balagtasismo.

Malayang taludturan na ang gusto mo.

Eh, ano ngayon?

Nagsusulat naman ako para mailabas ko lang ang nararamdaman ko.

Sabi mo ayaw mo na sa akin.

Eh, ano ngayon?

Meron namang tula.

Para sabihin ko sa iyong…

Eh, mahal pa rin kita ngayon.

Galit Ako Sa Iyo

Galit ako sa iyo
Di mo kasi ako pinapatulog
Laging ikaw ang laman ng isip ko
Kahit na pilit kong iwaksi sa aking isip
Ang bakas ng iyong mukha

Galit ako sa iyo
Kasi’y ginawa mo akong sinungaling
Sinabi ko kasi sa sarili
Na hindi na ako magmamahal pa
Ngunit bakit andali mong nakapasok
Sa tarangkahan ng buhay ko

Galit ako sa iyo
Dahil alam kong masasaktan lamang ako
Kagaya lamang ito nang aking mga nakaraan
Na walang patutunguhan
At kapararakan

Galit ako sa iyo
Dahil ginawa mo akong tanga
Umaasang may mapapala
Akala’y mayroong pag-asa
Sa kathang-isip na nobela

Galit ako sa iyo
Dahil ginawa mo akong duwag
Takot na sabihin sa iyo
Ang totoong nararamdaman ng puso

Galit ako sa iyo
Dahil ginawa mo akong mahina
Pinipilit kong magalit sa iyo
Pero di ko magawa

Kaya galit na ako sa sarili ko